പെന്‍ദഗണ്‍

1. ചിരി

കാല്ത്തള കിലുങ്ങിയപ്പോള്‍ ഞാന്‍ ചിരിച്ചു.

കൊലുസ്സ് കിലുങ്ങിയപ്പോഴും ഞാന്‍ ചിരിച്ചു.

ഇപ്പോഴിതാ ഈ ചങ്ങല കിലുങ്ങുമ്പോഴും

ഞാന്‍ ചിരിക്കുക തന്നെയാണ്.

2.ദക്ഷിണ

ഏകലവ്യനാവാന്‍ ഇഷ്ടമില്ലാഞ്ഞതിനാല്‍ ,

ഞാനെന്റെ പെരുവിരല്‍ നേരത്തേ ഉപേക്ഷിച്ചു.

ഗുരുവിനെ ദക്ഷിണയുടെ അപവാദത്തില്‍

നിന്നെെങ്കലും രക്ഷിക്കാന്‍ അതിനാല്‍ സാധിച്ചു.

3.സവാള

അടരുകളായി എന്നെയവര്‍ ചീന്തിയെടുത്തു കൊണ്ടിരുന്നു.

ഒടുവില്‍ , മനസ്സു മാത്രമായി ശേഷിച്ചപ്പോള്‍ 

ഉപയോഗശൂന്യമെന്നു കണ്ട് 

അവരെന്നെ തോട്ടത്തിലേയ്ക്ക് വലിച്ചെറിഞ്ഞു.

അവര്‍ക്കു ഭാഗ്യമുണ്ടങ്കില്‍ , 

അടുത്ത മഴക്കാലത്ത് അടരുകളാവാന്‍ 

ഞാന്‍ പുനര്‍ജനിച്ചേക്കാം.

4.ചങ്ങാത്തം

ചങ്ങാതി നന്നല്ലാഞ്ഞ നാളുകളില്‍

ഞാനെന്റെ കണ്ണാടി കളയാതെ സൂക്ഷിച്ചു.

ചങ്ങാതി നന്നായപ്പോള്‍ കൂടുതല്‍

തെളിച്ചമുള്ള മറ്റൊരെണ്ണം വാങ്ങേണ്ടി വന്നു.

5.പരിധി

മരണത്തിനും പരിമിധിയുണ്ട് സുഹൃത്തെ.

അതിനു ജീവനുള്ള വസ്തുക്കളെ

മാത്രമേ കീഴ്പ്പെടുത്താന്‍ സാധിക്കയുള്ളൂ.